នាពេលបច្ចុប្បន្ននេះ មនុស្យស្ទើរតែទាំងអស់ទៅហើយ ដែលបានដាក់ឧបករណ៍ស្មាតហ្វូនជាប់ខ្លួនរហូត ដល់ទៅ 24 ម៉ោងក្នុងមួយថ្ងែ ដោយទុកនៅក្នុងហោប៉ៅខោ ឬអាវ នៅពេលដែលមិនត្រូវការប្រើប្រាស់ និងយកមកដាក់ត្រចៀក នៅពេលត្រូវការនិយាយទូរសព្ទផងដែរ។ បើនិយាយអំពីការបារម្ភ ក្នុងខណៈពេលដែលមានស្មាតហ្វូនជិតខ្លួនវិញ គឺជាបញ្ហាធំជាងគេ និងជាបញ្ហាដែលមនុស្យជាច្រើន មិនសូវចាប់អារម្មណ៍ឡើយ នោះមានតែការបញ្ចេញវិទ្យុសកម្មប៉ុណ្ណោះ ដូច្នេះហើយបានជា ការិយាល័យសហព័ន្ធអាឡឺម៉ង់សម្រាប់ការការពារវិទ្យុសកម្ម (Bundesamt für Strahlenschutz) ដាក់បញ្ចេញតារាងបង្ហាញអំពី ម៉ូឌែលស្មាតហ្វូនណាមួយដែលស្ថិតនៅក្នុងកម្រិតខ្ពស់ និងខ្លះទៀតមិនសូវបញ្ចេញវិទ្យុសកម្មនោះឡើយ។
ស្មាតហ្វូនគឺពិតជាមានការពេញនិយម នៅក្នុងសម័យទំនើប ដោយឧបករណ៍អេឡិចត្រូនិកមួយនេះ អាចជំនួសដល់ការងារប្រចាំថ្ងៃបានយ៉ាងច្រើន និងថែមទាំងអាចកំដរភាពអផ្សុក អ្នកប្រើប្រាស់បានថែមទៀតផង ប៉ុន្ដែនៅលើពិភពលោកនេះ អ្វីក៏មានភាពអវិជ្ជមានដែរ ដោយសំដៅទៅលើស្មាតហ្វូនវិញ នោះគឺបញ្ហាវិទ្យុសកម្មតែម្ដង។ បើយោងទៅតាមតារាងរូបភាពខាងក្រោម នោះយើងនឹងឃើញថាម៉ូឌែលស្មាតហ្វូន ដែលស្ថិតនៅក្នុងចំណាត់ថ្នាក់កំពូលទាំង 3 គឺមានដូចជា Xiaomi Mi A1 ស្ថិតនៅលើកំពូលតែម្ដង បន្ទាប់មក OnePlus 5T ទទួលបានលេខ 2 និងចំណាត់ថ្នាក់លេខ 3 បានទៅលើ Xiaomi Mi Max 3 ផងដែរ។
ចំណែកឯក្រុមហ៊ុនផលិតស្មាតហ្វូន ដែលមានភាពល្បីល្បាញ Apple ក៏ឃើញមានស្មាតហ្វូនចំនួន 2 ម៉ូឌែល ជាប់នៅក្នុងតារាងមួយនេះនឹងគេដែរ ដោយមានតែ iPhone 7 និង iPhone 8 ប៉ុណ្ណោះ និងអ្វីដែលគួរឲ្យកត់សំគាល់នោះគឺថា ហាក់បីដូចជាមិនប្រទះឃើញមានម៉ូឌែលស្មាតហ្វូន សូម្បីតែមួយចេញពីក្រុមហ៊ុន Samsung នៅលើតារាងស្មាតហ្វូនដែលបញ្ចេញវិទ្យុសកម្មច្រើនជាគេមួយនេះសោះឡើយ។
ផ្ទុយទៅវិញ ម៉ូឌែលស្មាតហ្វូនជាច្រើន ដែលបានចេញពីក្រុមហ៊ុន Samsung ត្រូវបានប្រទះឃើញនៅក្នុងតារាងផ្សេងមួយទៀត សម្រាប់បង្ហាញអំពីម៉ូឌែលស្មាតហ្វូននានា ដែលបានបញ្ចេញវិទ្យុសកម្មតិចជាងគេផងដែរ។ ដោយចំណាត់ថ្នាក់លេខ 1 ត្រូវបានផ្ដល់ទៅលើ Galaxy Note 8 បន្ដដោយស្មាតហ្វូនពីក្រុមហ៊ុន ZTE ម៉ូឌែល Axon Elite និងចំណាត់ថ្នាក់លេខ 3 បានទៅលើស្មាតហ្វូន LG G7 តែម្ដង។
សរុបមក ប្រិយមិត្តអ្នកអានទាំងអស់គ្នា ប្រាកដជាឆ្ងល់ហើយថា ហេតុអ្វីបានជាស្មាតហ្វូនមួយចំនួន មិនមានមុខនៅលើតារាងទាំងអស់នេះ ដោយមូលហេតុអាចមកពីស្មាតហ្វូនទាំងនោះ មិនបានយកមកធ្វើតេស្ដដូចទៅនឹងស្មាតហ្វូនខាងលើ ឬមួយក៏អាចជាស្មាតហ្វូនទាំងនោះ ទទួលបានលទ្ធផលនៅចំពាក់កណ្ដាល ដែលមិនបញ្ចេញវិទ្យុសកម្មខ្លាំងពេក ហើយក៏មិនបញ្ចេញតិចដែរ បើពន្យល់ឲ្យស្រួលយល់នោះ គឺថាស្ថិតនៅកម្រិតមធ្យមផងដែរ។
ប្រភព: Cambo Report
